luns, 6 de febreiro de 2017

OPERACIÓN CABLE

As ANPA do CEIP A Pedra, o IES Johan Carballeira e o IES Illa de Ons veñen de reclamarlle á Consellería de Educación unha CONEXIÓN A INTERNET suficiente para satisfacer a demanda de velocidade do actual sistema educativo, o cal conta con cada vez máis recursos dixitais que non se poden utilizar pola falta de capacidade da rede.
A Consellería prometeu que para o ano 2018 teriamos conexión ultrarrápida. Consideramos que a promesa é demasiado imprecisa. Os colexios afectados atópanse moi próximos uns aos outros e nunha zona céntrica, a menos de 300 metros de vivendas e instalacións aos que si chega a fibra óptica da empresa que presta o subministro nestes centros do ensino.
Os centros levan xa varios anos reclamando máis velocidade de conexión. Actualmente, os máis de 1200 estudantes que suman os tres colexios, e o seu profesorado, teñen que arranxarse cada día cunha conexión que non pasa dos 8 megas. Calquera pode imaxinar o que ocorre cando están tódolos equipos, pizarras interactivas e demais recursos dixitais traballando ao mesmo tempo.
Consideramos que non é un problema menor. Afecta directa e gravemente á calidade da educación que reciben os nosos fillos e fillas, minguándolles a posibilidade de utilizar os recursos educativos propios do século XXI.
É por isto que temos decidido botarlle unha man á Xunta. Imos facerlle a doazón simbólica e reivindicativa de todo o cable que poidamos reunir, para ver se conseguimos así estimulalos e animalos a solucionar o problema de Bueu canto antes.
A campaña consiste en que cada alumno/a traia un metro de cable (serve calquera tipo de cable, novo, vello, liso ou engurrado) e o deposite na caixa que para o efecto atopara no seu centro.
Grazas anticipadas pola vosa colaboración

 Nos enlaces de embaixo podedes ampliar a información sobre este tema: